Jainkoari laguntza eske
Nasrudin pesta batera joateko prestatzen ari da. Bat-batean behaztopatzen da. Eta ospakizun handietan agertzen duen eraztun ederra galtzen du.Inguruan denetan xerkatzen du. Baina ez du nehon ere ikusten. Orduan, berak ezin duenez atzeman, jaungoikoari laguntza eskatzen dio:
- Oi Jauna, nire eraztuna galdu dut. Eta bestara heltzeko berant nabil gainera. Nire bitxia bilatzen laguntzen banauzu, hamar dinar emanen dizkizut, moskea konpontzeko, edo…
Hortxe dagoela belaunikaturik ahuspez jainkoari otoizka, eraztuna hantxe mahai azpian ikusten du. Berehala harrapatzen du. Eta jaunari mintzatzen zaio erranez:
- Oi, zu ahalguztiduna, ez du balio bilatzen aritzea, nire eraztuna nihaurek atzeman dut, eta!…
Hori hala bada halabiz, hala ez bada halatsu!
Hiztegia lantzen
Gramatika lantzen
Zatoz bazkaltzera
Pernando herri ttipi batean dago. Eguerditan elizako ezkilak jotzen du. Gure gizonak bazkaltzeko gogoa du, eta gose handia, gainera. Baina, bere inguruan ez du nehon ere ikusten sabela betetzeko paradarik.Orduan, herriko erretorea topatzen du. Pernandok agurtzen du eta erraten dio:
—Jauna, galdera bat egin behar dizut.
—Nahi duzun guzia, gizon!
- Gauza bat jakin nahi dut. Herri honetan, norbait bazkaitera gonbitatu nahi
delarik, nola egiten da?
—Ba hori ! molde anitzetan egin daiteke!
—Bai. Baina zer erraten da, bereziki?
—Nola erran?… Ba! “Nerekin bazkaltzera jiten bazara, bozkariatuko naiz!”.
—Poztasun hori oraintxe berean eskaintzen dizut beraz jauna!
—E! Zer?
—Zurekin bazkaltzera etorriko naizela!
—Baina?…
- Aspalditik beha nago, noiz eta zer-nolako hitzekin horrelako gonbita entzunen nuen!
Eta nahi ala nahi ez, herriko apezak Pernando berarekin bazkaltzera eraman behar izan du.
Hori hala bada halabiz, hala ez bada halatsu!
Hiztegia lantzen
Gramatika lantzen